Koronabirusa Uribe Kostan

Udalerriko ekonomia indartzeko 5.000 euro bideratuko ditu Barrikako Udalak

COVID-19ari aurre egiteko alarma egoeraren ondorioz eten diren edo larriki kaltetu diren jardueren zuzeneko galera ekonomikoaren egoera arintzeko diru-laguntzak onartu ditu Barrikako Udalak. Laguntzok udalerriko enpresa eta merkatarientzako izango dira. Roberto Muñoz Barrikako alkateak adierazi duenez, “alarma egoerak eragindako geldialdiak kaltetutako sektore bati laguntzeko unea da; hori dela eta, 5.000 euro bideratuko ditugu gure herrian beharra duten autonomo eta saltokientzat, jarduerari berriro ekiteko aukera izan dezaten”.

Barrikako Udalak 5.000 euroko kreditua onartu du, aurrekontu-aldaketen bidez eguneratzeko aukera alde batera utzi gabe, eta diru-laguntza eta pertsona bakoitzeko gehienez 500 euro jaso ahal izango dira. Barrikan txikizkako edo ostalaritzako merkataritza-jarduera bat garatzen duten pertsona fisiko edo juridikoek eta autonomoek eskatu ahal izango dute laguntza, baldin eta honako baldintza hauek betetzen badituzte: COVID-19aren ondorioz beren jarduera derrigor eten behar izana, zerga-egoitza udalerrian izatea, eta EJZn alta emanda egotea baztertuta ez dagoen enpresa- edo lanbide-jarduera batean. Gainera, legez eratuta eta dagozkien erregistroetan izena emanda egon behar dute.

Autonomoen kasuan, hauexek dira baldintzak: alarma egoera deklaratzen den egunean afiliatuta eta alta emanda egotea, establezimendua 2020ko martxoaren 14a baino lehen irekitzeko lizentzia izatea, eta, pertsona juridikoen kasuan, deialdiko baldintzak betetzen ez dituzten enpresek zuzenean edo zeharka % 25eko partaidetza ez izatea. Azpimarratu beharra dago laguntza-eskaera bakarra aurkez daitekeela pertsona fisiko, sozietate zibil edo ondasun-erkidego bakoitzeko.

Interesa duen orok eskatu ahalko du laguntza, laburpena BAOren deialdian aurkeztu ondoren, 946 771 062 telefonoaren bidez edo adm@barrika.eus helbide elektronikoan.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun