Barrika Piragua Taldeak hirugarren postua eskuratu du Euskadiko Neguko Txapelketan

Barrika Piragua Taldeko partaideak Irunen egin zen proban. © BARRIKA PIRAGUA TALDEA

Emaitza onak lortu ditu Barrika Piragua Taldeak hasi berri den denboraldian: Euskadiko Erlojupeko Txapelketan eta Euskadiko Neguko Txapelketan bigarren eta hirugarren postuak eskuratu ditu, hurrenez hurren.

Urte oso bat lehiatu barik egon eta gero, Barrika Piragua Taldeak emaitza onakaz hasi du denboraldia. Lehenik, otsailaren 27an, Legution egin zen erlojupeko 2.000 metroko Euskadiko Txapelketan, taldeen sailkapenean, bigarren postua eskuratu zuen. Maila guztietako 19 palista barrikoztarrek parte hartu zuten froga horretan.

Martxoaren 7an, aldiz, Irunen egin zen Euskadiko Neguko Txapelketan Barrika Piragua Taldea hirugarrena izan zen 5.000 metroko frogan. Horretara, maila guztietako 23 taldekide bertaratu ziren, eta horien artean zueden Irene Gana eta Ane Eileen Mesa, 23 urtez beherako kategorian eta kadeteetan garaileak, hurrenez hurren.

Iker-Ekaitz Libano Barrika Piragua Taldeko teknikoa eta entrenatzaileak adierazi du oso emaitza onak izan direla, "kontutan hartuta kluba obretan dagoela eta pandemia egon dela tartean". Horretaz gain, taldeko palisten kopuru handia eta partaidetza ere nabarmendu ditu.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun