Barrikako Udalak lau Inaus-gune ipini ditu, inausketen eta lorezaintza-lanen hondakinak uzteko

Barrikako Udalak lau Inaus-gune jarri ditu udalerrian, hondakin organikoak hobeto kudeatzeko. © BARRIKAKO UDALA

Barrikako Udalak inausketen eta lorezaintza-lanen hondakinak batzeko lau edukiontzi berezi jarri ditu, hondakin organikoen kudeaketa egokia egin ahal izateko. Edukiontziak, Inaus-gune izenekoak, irekiera elektronikoa eta 24 orduko bideo-zaintza sistema duen hesitutako eremuetan jarri dituzte. Bizilagunek errefusaren eta organikoaren edukiontziak zabaltzeko erabiltzen duten txartel bera erabili ahalko dute gune horietara sartzeko. 

Udalak 57.000 euro bideratu ditu Barrikan lau Inaus-gune berri eraikitzeko. Roberto Muñoz alkateak adierazi duenez, "edukiontzi finko horiek instalatzearen helburua erabilera desegokia saihestea da". Gaineratu duenez, "gune horien bitartez, inausketen eta lorezaintza-lanetako hondakinak erretiratzeko garaian eta batu ondoren, behar bezala atera eta biltegiratu ahal izango dira". Zehaztu du udalerriko lau lekutan ipini dituztela gune berriak: Zabaletxen, Abaroan, Artepetan eta Garramunen.

Bestalde, nabarmendu du galarazita dagoela konpostatu ezin diren hondakin begetalak edo inpropioak uztea edukiontzietan, hala nola loreontziak, obra-hondakinak, ontziak, plastikoak, enbalajeak... Horretaz gain, bertara botatzeko hondakin ohikoenak zerrendatu dituzte: palmondo-adarrak; kanaberak (banbua, etab.); erretxinadunak, hala nola altzifreak edo pinuaren familiakoak, esate baterako.

Inaus-guneak erabiltzeko arauak

Gune horiek era egokian erabiltzeko zenbait arau ezarri ditu Barrikako Udalak: hondakinak era ordenatuan pilatzea, atea itxita geratzen dela ziurtatzea, instalazioak modu egokian erabiltzea edo irregulartasunik edo atea zabaltzeko mekanismoan akatsik sumatuz gero Udalari jakinaraztea. Halaber, udalerrian bizi ez direnei edo Barrikako udalerritik kanpo lorezaintza-lanak egin behar dituzten langile autonomoek edo enpresek debekatuta dute inaus-guneak erabiltzea. Araudi horregaz, Udalak guneen garbiketa hobetzea, eta, batez ere, puntu finko horiek hobeto erabiltzea bilatzen du.

 

Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun