Energia berriztagarrien alde egiteko ildoari eutsita, Barrikako Udalak diru-laguntzak emango dizkie euren etxeetan eguzki-panelak jartzen dituzten auzokideei. Horren bidez, % 95era bitarteko hobaria aplikatuko diote eraikuntzen, instalazioen eta obren gaineko zergari, eguzki-energiaren aprobetxamendu termiko edo elektrikorako sistemak gehitzen diren kasuetan.
Udalak azaldu duenez, hobaria jasotzeko, beroa sortzeko instalazioek kolektoreak izan behar dituzte, administrazio eskudunak behar bezala homologatuta. Hobaria eguzki-energiaren aprobetxamendu-sistemetara bideratutako zenbatekoei bakarrik aplikatu ahal izango zaie, indarreko legediaren arabera inbertsio hori derrigorrezkoa ez den kasuetan.
Barrikako alkate Roberto Muñozek adierazi duenez, "ingurumenarekiko udalerri abegikorragoa eraikitzen jarraitzen dugu, eta, gure herritarren interesa eta kontzientziazioa ikusita, Udalak laguntza emango du instalazio horiek egin ahal izateko".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
