XXV. Nekazaritza eta Artisautza Azoka egingo dute domekan Barrikan

San Juan jaien ohiko jarduerak berreskuratzeagaz batera, Nekazaritza eta Artisautza Azokaren XXV. edizioa egingo dute Barrikan, domekan. Hala, 10:00etatik 15:00etara, 25 saltoki baino gehiago egongo dira askotariko produktuez gozatzeko, udaletxearen ondoko plazan.

Azokan hainbat gairen saltokiak egongo dira: euskal pastela, gaztak, kontserbak, likoreak, eztia... Baita txakolina, gildak, talo-saltoki bat eta egur-labe bat ere, inguruko ogi eta opilik onenak dituena.

Elikagaiak ez dira azokako protagonista bakarrak izango, ordea. Horrez gain, askotariko artisautza-produktuak egongo dira. Hala, bisitariek aukera izango dute bitxiak, poltsak, nezeserrak, xaboi naturalak, belarritakoak, material birziklatuz egindako gaiak... aurkitu eta erosteko.

Roberto Muñoz Barrikako alkateak esan duenez, “San Juan jaien ospakizunean murgilduta gaude, eta azoka hau da gure udalerrira etorri nahi duten herritarrei zuzendutako jardueretako bat. Aurten berriz ekingo diogu, eta, bertan, gure lurreko zenbait produktu eskainiko dira. Horien alde egin behar dugu, eta beren sorkuntzak eskainiko dituzten artisauen lan handiaren balioa nabarmendu”. 

Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun