Barrikako Udalak ohiko argazki-rallya antolatuko du beste urte batez. Argazkizaleentzako lehiaketa hori ekainaren 18an izango da, goizeko 10:00etatik aurrera. Interesatuek aldez aurretik izena eman beharko dute, hilaren 12ra arte. Gehienez ere 50 pertsonak parte hartu ahal izango dute, eta norberak bere kamera erabili beharko du.
Ekainaren 18an, eskualdeko argazkizaleek hitzordu garrantzitsua izango dute Barrikan; zita goizeko 10:00etan hasiko da, eta udaletxeko plazan batuko dira. Lau gai emango dituzte, eta lehenengoa udaletxean bertan emango dute; gainontzekoak 45 minutuan behin jakinaraziko dituzte, Jubilatuen Etxean.
Aurretiazko izen-ematea ekainaren 12a baino lehen egin behar da, mezu bat bidaliz rallya@barrika.eus helbide elektronikora. Horren ostean, izena ematen dutenek baieztapen-mezua jasoko dute. Parte-hartzaileen behin betiko izen-ematea ekainaren 18an bertan egin behar da, 09:00etatik 09:45era, Barrikako udaletxeko eraikinean.
Oinarri osoak eta sarien zerrenda Barrikako Udalaren webgunean ikus daitezke.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
