Urriaren 21ean

Emakumeak eta kirola izango dute hizpide Barrikako Emakumeen bigarren topaketan

Nahia Martinez Gondra 2023ko urr. 18a, 16:25
Emakume kirolariek mahai-inguru batean parte hartuko dute. Argazkia: FREEPIK.

Barrikako Emakumeen Hitza elkarteak bigarren urtez jarraian aurkeztu du Emakumeak Landa-Ingurunean proiektua tokiko Udalagaz elkarlanean. Aurten, emakumea eta kirola gaia jorratuko dute: urriaren 21ean, zapatuan, ahotsa emango zaie erreferenteak diren, beren ibilbidean lorpen handiak lortu dituzten eta beren historia kontatuko duten emakumeei. Hala, emakume kirolariek mahai-inguru batean parte hartuko dute egun kirolean bizitzen dituzten egoerei buruz eztabaidatzeko. Gainera, Beatriz Carretero egilearen Hijas de Cynisca dokumentala ere proiektatuko dute. Filmak kiroletan dauden genero ezberdintasunak jorratzen ditu.

Proiektu honegaz kiroletan generoen artean dauden desberdintasunak desagerrarazteko ideiak proposatuko dituzte. Halaber, egin diren aurrerapenak ere nabarmenduko dituzte, baita oraindino egiteke dagoen bideari buruz ere mintzatuko dute.

Hala, dokumentala urriaren 21ean, zapatuan, proiektatuko dute goizeko 10:00etan, Emakumeen Hitza emakumeen lokalean, Txintxilandia eraikinean. Filma kontzientziazio, sentsibilizazio, aldarrikapen eta hezkuntza tresna gisa erabili gura dute. Proiekzioaren ondoren, emakume kirolariek mahai-inguru batean parte hartuko dute, egun kirolean bizitzen duten egoerari buruz eztabaidatzeko.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun