Barrikako Udalak gogoratu du "derrigorrezkoa" dela heskaiak behar bezala inausita edukitzea, "inguruko bizilagunei eta udal-bide eta espaloiei eragin ez diezaieten". Era berean, gogoratu du inausketen hondakinak batzeko biltegiak daudela auzoetan, hain zuzen, Arriagan, Zabaletxen, Artepetan eta Garramunen, baita frontoiaren ondoan ere.
Udal-iturriek gogoratu dutenez, heskaiak erregulartasunez mantendu behar dira, "altueran nahiz zabaleran haztea saihesteko". Heskaietarako nahiz bestelako itxituretarako baimendutako gehieneko altuera 2,50 metrokoa da, eta kanpoko aldea lurzatiaren mugagaz lerrokatu beharko da, "eta ez dira inola ere asfaltoa edo espaloiak inbaditu beharko".
Era berean, azpimarratu dute eraikuntzagaz edo eraikuntzarik gabe dauden lurzatien titularrak behartuta daudela osasungarritasun-, higiene-, segurtasun- eta apaindura-baldintza egokietan mantentzera.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
