Urriaren 31n, eguenean, Arimen Gaua ospatuko dute Barrikan, "gure kulturaren inguruko ekitaldia, Euskal Herriko berezko tradizioak sustatzeko", azaldu dutenez arduradunek.
Egun horretan, herritarrek aukera izango dute Barrikako Udalak prestatutako jarduerez gozatzeko. Edizio hau Ander Deunan ospatuko dute, Goierri auzoan. 18:00etan ipuin-kontalariaren saioa hasiko da, “Sorginak eta beste munstro batzuk” izenekoa, 4 eta 12 urte bitarteko umeentzat. 19:00etatik aurrera, ginkana egingo dute pilotaleku txikiaren inguruan. Gainera, arrastian zehar Arimen Gauari buruzko photocalla eta atrezzoa egongo dira, gura dutenentzat.