Atzo, martitzenean, izan zen inauterietako tostada lehiaketa Barrikan. Hamaseigarren edizioa izan da aurtengoa, eta, ohi legez, parte-hartzea handia izan da. Udal-iturriek zehaztu dutenez, aurreko egunetan 14 inskripzio jaso zituzten, baina azkenean 12 erretilu aurkeztu ziren norgehiagokara. Horietatik, Itziar Elexpek jaso du lehenengo saria; Esther Gutierrezek, bigarrena; eta Ainara Elkanok, hirugarrena.
Epaimahaia hiru barrikoztarrek osatu zuten, eta lan zaila izan zutela nabarmendu dute, parte-hartzaileen artean maila handia baitzegoen. Maruja Rodriguez, Monica Mate eta Joseba Unibaso arduratu ziren dastatzeaz eta Barrikako tostada onenak baloratzeaz.
Sari-banaketaren ondoren, ohi bezala, lehiaketa ikustera udaletxera hurbildu ziren herritarrek aurkeztutako tostadak dastatu zituzten.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!