Barrikako Udalak euskararen ikaskuntza eta erabilera sustatzeko diru-laguntzen deialdia onartu du 2023-2024 ikasturterako. Laguntza hauek udalerrian erroldatuta dauden herritarrei zuzenduta daude, euskaraz ikasten ari diren edo ikastaro bat egin duten pertsonei gastuaren %100era arteko itzulketa eskainiz, gehienez 600 euroko diru-laguntzagaz.
Subentzioak zentro ofizialetan edo Uribe Kostako Zerbitzu Mankomunitateko Euskara Zerbitzuaren bidez egindako ikastaroetarako izango dira baliagarriak. Eskatzaileek gutxienez ikastordu guztien % 90ean parte hartu, maila gainditu, Barrikan erroldatuta egon eta udalagaz zerga-betebeharrak egunean izan beharko dituzte.
Udalaren helburua argia da: "Euskara herritarren artean sustatu eta erabilera errealari bultzada ematea", adierazi dute. Programa honek, gainera, euskararen normalizazioan urrats garrantzitsua suposatu gura du, ikasle berrien parte-hartzea erraztuz eta hizkuntza ohiturak indartuz udalerrian.