Arrastiko topaketak mahai baten bueltan elkartzeko, hitz egiteko eta elkarregaz egoteko aukera eskainiko die herritarrei. Horrela, adinekoek Barrikako egunerokoan duten presentzia eta herriko bizitza sozialean egiten duten ekarpena aitortu gura dituzte, belaunaldien arteko harremanak indartzeagaz batera.
Itziar Unibaso alkatearen esanetan, "gure adinekoek Barrikaren memoria bizia, indarra eta nortasuna ordezkatzen dituzte". Horregatik, ekimena ez da merienda hutsa izango: urteetan herriari egindako ekarpena eskertzeko eta adinekoei aitortza egiteko topagunea ere izan gura du.