Udalak zehaztu du deialdi hori baliatu ahal izango dutela irabazi-asmorik gabeko jubilatuen, emakumeen, auzo- eta kultura-elkarteek, egoitza soziala Barrikan dutenak eta bai dagokion erregistroan bai Elkarteen Udal Erregistroan inskribatuta daudenak. Elkarte bakoitzak hiru proiektu aurkeztu ahal izango ditu gehienez, eta laguntzak proiektuaren zuzeneko gastuetarako erabili beharko dira soilik.
Aurkeztutako proiektuak herrian gauzatu beharko dira (txangoak izan ezik), 2026ko ekitaldian, eta gutxienez sei pertsonako publiko bati zuzenduta egon eta 300 euroko aurrekontua izan beharko dute, Udalak adierazi duenez. Antzezlan amateurrak, euskara sustatzeko programak, musika- eta folklore-ekitaldiak, ume eta helduentzako aisialdi-ekimenak, elkarteen arteko proiektuak, hirugarren adinerako dinamizazio-ekintzak, aukera-berdintasuna sustatzea eta genero-indarkeria prebenitzea xede duten proposamenak eta txango eta bidaiak lagunduko dira. Aitzitik, araudiak berariaz uzten ditu kanpoan jai egitarauak.
Eskaerak udaletxean aurkeztu behar dira, azaroaren 12ra arte, eta eskaera-formularioagaz batera, sinatzailearen NANaren fotokopia, zein botere edo ordezkaritzagaz jarduten duen egiaztatzen duen dokumentazioa, erakundearen IFKren fotokopia, dagokion erregistroan izena emanda egotearen ziurtagiria, erakundearen estatutuen kopia eta Ogasunean eta Gizarte Segurantzan egunean egotearen ziurtagiria. Udalak azaldu du dokumentu horiek daborduko udal-administrazioaren esku badaude eta horietan aldaketarik izan ez bada, nahikoa izango dela erantzukizunpeko adierazpen bat eranstea, noiz eta non entregatu ziren adierazten duena.
Horregaz batera, Udalak adierazi du proiektu bakoitzaren azalpen-memoria bat eskatuko dela, jardueraren beharra eta eragina, hartzaileen profila, helburuak, aurrekontua eta gastuen justifikazioa, datak eta lekua, eta proiektuaren alderdi berritzaileei baita euskarak proiektuan duen presentziari eta erabilerari buruzko zehaztasunak azaldu behar dituena. Akatsen bat edo osatu gabeko dokumentazioa atzemanez gero, erakundeari 10 egun naturaleko epea emango zaio hori konpontzeko.