Kultur, kirol eta aisia jarduerak sustatzeko ohiko diru-laguntzak eskatzeko epea martxoaren 31ra arte luzatu du Berangoko Udalak, epetik kanpo aurkezten diren eskabideak baztertu egingo dituzte zuzenean. Kultura eta aisialdiaren arloan, 61.500 euro bideratuko ditu Udalak; kirolerako, berriz, 90.700 euro. Edozein pertsona fisikok edo juridikok eskatu ahal izango ditu laguntza horiek, baldin eta helbide soziala edo kokapen iraunkorra Berangon izan eta Berangoko Udalaren Elkarteen Udal Erregistroan inskribatuta badago. Halaber, udalerrirako interesgarria den kultur, kirol edo aisia jardueraren bat garatzeko asmoa izan behar du. Horrez gainera, lehenago ere Udalak diru-laguntzaren bat jaso dutenek horren azalpena edo justifikazio memoria aurkeztu beharko dute.
Aipatutako diru-laguntzak eskatzeko deialditik kanpo geratuko dira ikastetxeek antolatzen dituzten jarduera guztiak.
Diru-laguntzen onuradunek honako baldintza hauek bete behar izango dituzte: kultura, kirol eta aisiaren eremuan diru-laguntzak emateko modua arautzen duen udal ordenantzaren arauak betetzea, emandako diru-laguntza onartzea zazpi eguneko epean, helburu zehatza adieraztea, jarduera garatzeko beharrezko baimen guztiak lortzea, jarduerarako lantzen diren karteletan, testuetan edo agirietan euskara eta gaztelania erabiltzea, Berangoko Udalaren babesa aipatzea, eta emandako zenbatekoaren erabilera justifikatzea, besteak beste.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
