Ertzaintzak 43 urteko gizonezko bat atxilotu zuen joan den barikuan, hilak 12, Berangoko argiteria publikoan 16 lapurreta egitea egotzita, Eusko Jaurlaritzako Segurtasun Sailak jakinarazi duenez. Ustezko ebasketak 2015eko martxoa eta azaroa bitartean izan ziren. Iturrien arabera, bi lekukok kablea lapurtzen harrapatu zuten atxilotutako gizona joan den urrian; lapurreta egin ostean ihes egitea lortu zuen, furgoneta batean.
Halaber, Ertzaintzak 27 urteko beste gizonezko bat inputatu du lapurreta horietan konplize izatea egotzita. Polizia autonomikoaren berbetan, Berangon ostutako kableak 20.000 euroko balioa du.
Bestalde, atxilotuak Gorlizen, Plentzian, Getxon, Sopelan eta Urdulizen izandako beste lapurreta batzuetan parte hartu ote duen ikertzen dabil Ertzaintza.
Duela urtebete Galdakaon atxilotu zuten, argiteria publikoko kablea lapurtzea egotzita.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.