Berangoko lau haur-parke berritu ditu Udalak, bertako segurtasuna handitzeko

Erabiltzailearen aurpegia Hiruka 2016ko otsailaren 19a

Haur parkeak berritzeko lanetan 77.000 euro inbertitu dituzte. © BERANGOKO UDALA

Umeentzako lau jolasleku hobetzeko beharrei ekin dio Udalak, modernizatzeko eta segurtasuna areagotzeko helburuagaz. Moreagan, denera, sei zabu hartzen zituzten bi elementu kendu, eta trebetasunerako berri bat gehitu dute, sokak eta pasaguneak dituena, erabiltzen dituzten umeen adin-tartea handitzeko. Lauza-zoladura ere aldatu dute, eta kautxuzkoa, ezarri. Lantzarten, ostera, zabu eta txirrista bana aldatu dituzte, eta kulunka berria ipini dute. Era berean, aparatu zaharren malgukiak ordezkatu dituzte.

Axganeko Ricardo Otxoa parkean ere zabuak kendu eta berriak jarri, eta trebetasun-jokoa ipini dute. Azkenik, Berangoeta kultur etxearen atzealdeko parkean ere aldaketak egin dituzte. Guztira, elementuak ordezkatzeko gastua 64.000 eurokoa izan da; kautxu-lurzorua hobetzeko inbertsioa, berriz, 13.000 eurokoa.

Halaber, Moreagako parkea estaltzeko lanak lizitazio-prozesuan daude. Proiektu horri dagokionez, aurretik, herritarren parte-hartze prozesu bati ekin beharko diote; ondoren, auzokideen proposamenen arabera obrak garatzeko.

Jendartea Berango
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun