Urtero legez, Berangoko ekoizleek Ardo Eguna antolatuko dute. Aurtengoa XVI. edizioa izango da, eta hilaren 5ean, domekan, egingo dute: herriko 18 ardogilek etxean egindako 600 botila txakolin eskainiko dizkiete bertaratuko diren ardozale guztiei. Eguerditik aurrera ekingo diote festari, 12:00etatik 15:00etara, Sabino Arana kaleko Nagusien Etxeko plazan.
Bertan, 11 etxola egongo dira: bederatzik ardoa eskainiko dute, eta etxola bana egongo da ogia gaztagaz edo txorizoagaz banatzeko. Iragarri dutenez, ekoizleek prezio ezin hobean salduko dute euren produktua. Izan ere, urtero diseinatzen duten kopa berezia lau euroan erosita, gura beste ardo eta ahal beste pintxo hartu ahal izango da; antolatzaileen arabera, 65 kilo txorizo egosi eta 9 kilo gazta banatuko dituzte.
Hala bada, zintzurra bustitzeaz gainera, sabela betetzeko aukera ere egongo da Berangon. Esan barik doa, urtero legez, txakolina maite dutenentzako egundoko hitzordua izango dela.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.