Berangon, gazte ekintzaile bila dabiltza. Horretarako, Berangoko Gazte Ekintzaileen lehenengo Topaketa antolatu dute ekainaren 27rako, astelehena. Hitzordua 19:30ean ipini dute, Berangoeta kultur etxean, eta 20:30ak arte iraungo duela iragarri dute. Bertan, parte-hartzaile guztiek lan-mahai batean parte hartuko dute, "gure herriko eta inguruko emakumeekin eta gazte ekintzaileekin", azaldu dute antolatzaileek.
Horrez gainera, EAEko hainbat ekintzaile joango dira, ekin- eta sortze-prozesuan izan dituzten esperientziak aurrez aurre kontatzera. Topaketa horretan parte hartu gura duten gazteek aldez aurretik izena eman beharko dute.
Azaldu dutenez, doakoa izango da, eta "interesaturik dagoen edozein pertsona joan daiteke, tokiak bete arte (15-20 lagun)". Ekimen hori Berango Hiri Gaztea proiektuaren barruan dago; joan den maiatzaren 25ean jarri zuten martxan.
Ideia-lehiaketa
Maiatzean abiatutako proiektuan zehaztutako helburuetako bat da ekintzailetza sustatzea, "garapen pertsonala, gizarte berrikuntza, autoenplegua eta garapen ekonomikoa lortzeko bidea" delako. Hala, Berangoko Gazte Lehiaketa - Ideiak ekimena ere abiatuko dute hilaren 27an.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.