Guardia Zibilak Ibai Aginaga preso politiko berangoztarrari emandako tratu higuingarria salatu du Amnistiaren Aldeko eta Errepresioaren Aurkako Mugimenduak. Aginaga Sevilla II (Moron de la Frontera) kartzelan dago preso, eta joan den eguenean ospitalera eraman behar zuten daukan bihotzeko gaitza dela-eta azterketa egiteko, azaldu dutenez. Ospitalera eraman behar zuten guardia zibilek, ordea, bertara joan aurretik "haien aurrean biluztea agindu zioten Ibairi; honek uko egin zion horri, erakunde militarraren kideen helburu bakarra bera umiliatzea eta makurraraztea zelakoan".
Horren ondorioz, poliziek ospitaleko irteerari uko egiten ziola sinatzeko esan zioten; berangoztarrak horri ere uko egin zion, berak ospitalera joan gura zuelako.
"Ibairen bigarren ezezko honek sutan jarri zituen guardia zibilak eta hasieratik mantentzen zuten jarrera oldarkorra are eta oldarkorragoa bihurtu zen, irainetara, mehatxuetara eta, haietako baten kasuan, eraso fisikoaren saiakerara pasatu zelarik buruzagiak gelatik irtetea agindu zion arte", salatu dute errepresioaren kontrako kideek; "Ibaik adierazitakoaren arabera oso egoera gogorra izan zen eta, gainera, azkenik azterketa medikurik gabe gelditu zen, sufritzen duen gaitza oso gauza larria dela kontuan izanda".
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.