Berangoko Nazioarteko Miliaren 30. edizioa jokatuko da datorren irailaren 30ean, zapatuan, Gobelaldeko zirkuituan. 16:20tik aurrera korrika egingo dute ehunka atletek, nazioarteko izarrakaz batera. Daborduko, probarako izen-ematea zabaldu du Berango Atletismo Taldeak bere webgunean.
Datorren irailaren 28ra arte egin ahal izango da inskripzioa, doan, 17 kategoriatako 13tan; beste lauak gonbidapenen bidez beteko dira. Kategoria bakoitzean gutxienez 3 atleta eta gehienez 40 izango dira, zirkuituko 1.609,344 metroak betetzeko, nork bere kategorian. Dortsalak jaso beharko dituzte parte-hartzaileek honako hitzorduren batean: irailaren 29an, Berango Antzokian, 18:00ak eta 20:00ak bitartean; edo probaren egunean, 15:15etik aurrera.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!