Asier Garcia Justo euskal preso politikoaren bikotekideak trafiko-istripua sufritu zuen joan den irailaren 16an, Badajozeko espetxera bidean zela, Ruta de Plata inguruan, Etxerat elkarteak jakinarazi duenez. Garcia Justoren bikotekidea berangoztarra da, eta iturriek jakinarazi dutenez, istripuak nerbio-estutzea eragin dio "lunbar zein zerbikaletan, eskumako besoan fisura muskularra eta saihets-hezurretan kolpe fuertea". Hori dela eta, Etxeratek aurkeztutako mozio bat eztabaidatuko dute bihar, martitzenean, Berangoko Udalbatzan, 19:00etatik aurrera.
Istripua Ruta de Platako 400 kilometroan jazo zen, Salamancatik 70 kilometrora dagoen Bejar udalerria atzean utzi ondoren. Berangoztarra bere bidetik gidatzen zebilela, atzetik bi erreien artean gidatzen ari zen auto batek aurretik eraman zuen bere autoa. Autoak hiru itzulipurdi eman zituen, eta aurreko eskumako gurpila lehertu eta autoaren alde bat kaltetu ziren.
Istripuaren eraginez Asier Garcia Justoren bikotekideak bere etxetik 706 kilometrora dagoen Badajozeko espetxean zuen bisita galdu zuen eta, Bejarreko ospitalean artatu ostean, Urdulizeko ospitalera eroan zuten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
