Sei Herri kultur elkarteak 35. Ibilaldi Neurtua antolatuko du bihar, domekan. Prestatutako ibilbideak Uribe Kosta zeharkatuko du, eta goizean goiz hasiko dira izen-emateak Sei Herri herriko tabernan. Nagusien kasuan 08:15ean izango da, eta txikiek, ostera, 09:00etan egin behar izango dute. Ordu horretan aterako dira helduak, eta txikiak, berriz, ordu erdi geroago. Nagusien ibilbideak 16 kilometroko luzera du, eta, txikienak, 8 kilometrokoa.
Mendi-bueltaren ostean, egitarau zabalaz ospatuko dute 35. urtemuga berezia: bertako elikagaien azoka eta txerria txingarretan erreta egongo dira 12:00etatik aurrera. Ordubete geroago, nagusiek trikiti-poteoa izango dute aukeran Sei Herritik hasita, txikiek Nagusien Etxearen ondoko plazan Enaitz pirataren ipuinez gozatzen duten bitartean. Txikiek 14:00etan bazkalduko dute, frontoian, eta ordubete beranduago-edo, nagusien txanda helduko da, musikaz girotuta.
Umeen bazkaria doakoa izango da parte-hartzaileentzat; helduena, ostera, bertan erosi ahal izango da zazpi euroan. Bazkariaren ondoren, umeek animaziozko filma ikusi ahal izango dute Berangoeta kultur etxean. Helduen bazkariaren ostean, ostera, sari-banaketa hasiko da.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
