Aurten ere, Fair Saturday (Bidezko Zapatua) Eguna ospatuko dute Berangon, azaroaren 24an. Hala, ekitaldi horretarako programa osatze aldera, herritarren proposamen bila dabil Berango Gazte Mahaia. Edozeinek aurkez dezake ekintzaren bat, urriaren 14a baino lehen.
Azaroaren 24rako antolatutako ekintza horiekaz denakaz lortuko duten etekin ekonomikoak norberak gura duen entitate sozialera bideratu ahal izango du. Horretarako, ekitaldien antolatzaileek sarrera jarri edo borondatea eskatu ahal izango dute, besteak beste. Izan ere, egun horren helburua da artearen eta kulturaren bidez mundua aldatzea, ekitaldietatik ateratzen den dirua gobernuz kanpoko erakunde batentzat bideratuz.
Berangoztarrek jakinarazi dutenez, daborduko hainbat proposamen aurkeztu dira eta datorren hilaren 14ra arte egongo da gehiago aurkezteko aukera. Horretarako helbide honetara bidali beharko da mezu bat: mesajovenberango@gmail.com.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun