Aurrekontuak osatzeko prozesu parte-hartzailea abiatu du Berangoko Udalak

Berangoko Udalak 2019ko aurrekontuak osatzeko prozesu parte-hartzailea abiatu du. "Bidea egiten" lemapean, berangoztarrek euren proposamenak aurkeztu ahal izango dituzte. Horren helburua da, Carlos Collado Ogasuneko zinegotziak nabarmendu duenez, "herritarren beharrak eta lehentasunak ezagutzea kontuak egitean kontutan hartu ahal izateko".

Hirugarren aldia da Berangoko Gobernu-taldeak ekimen hori bultzatzen duena, eta udalerrian erroldatutako 16 urtetik gorako edozein pertsonak parte hartu ahal izango du. Udal-arduradunentzat "garrantzitsua da parte hartu duten herritarren iritzia, Aurrekontuak prestatzerakoan erabilgarria izango delako".

Besteak beste, ekintza bi egingo dituzte prozesu hori herritarrei hurbiltzeko eta parte-hartzeko zer egin behar den argitzeko. Lehenengoa atzo izan zen, Berangoeta kultur etxean. Hurrengoa, aldiz, azaroaren 7an izango da, 19:00etan, Nagusien Etxean.

Proposamenak azaroaren 11ra arte aurkez daitezke. Udal-eskuduntzakoak izan behar dute, ondoko gaiakaz erlazionatuta: Hirigintza, Lanak eta Zerbitzuak, Berdintasuna, Kultura, Hezkuntza, Euskara, Gazteria, Droga-mendekotasuna, Ingurumena, Osasuna, Herritarren Segurtasuna, Herri-babesa eta Gizarte Ekintza.
 
Proposamen denek bideragarriak izan behar dute teknikoki eta ekonomikoki bere jasangarritasun ekonomiko eta finantzarioa justifikatuz; onura orokorrari eta herritar guztien onurari lehentasuna emango zaie bakoitzaren interesen gainetik eta herriaren lurralde oreka bermatuko da.