Bizkaiko nekazariek eta gozogileek ezinbesteko hitzordua dute domekan Berangon

Berangoko Nekazaritza eta Artisautza Azoka 2011n. © BERANGOKO ALBISTEAK.

Bertoko nekazariak eta artisauak Berangon bilduko dira aste-akabuan. Izan ere, urtero legez, Berangoko Simon Otxandategi dantza-taldeak Nekazaritza eta Artisautza Azoka antolatu du domeka honetarako. Aurtengoa XXVI. ekitaldia izango da, eta guztira 66 postu egongo dira Moreaga parkean.

Horietan denetan, honakoak aurkitu ahal izango dira: bisuteria, harri landuak, arropa, arrain-kontserbak, barazkiak, pastelak, ogiak, eztia, txakolina, loreak, txokolatea eta trufak, besteak beste. Ezin aipatu barik utzi, azokaz gainera, aurten ere ospe handiko euskal pastel onenaren Euskadiko lehiaketa egingo dutela; XXI. edizioa izango da oraingoa. Euskal Herriko txoko ezberdinetatik etorritako gozogileek parte hartuko dute norgehiagokan; horiek ere euren postutxoa izango dute azokan.

Horrez gainera, txosna bi egongo dira aurten taloa txorizoagaz saltzeko. Gainera, Otxandategi taldeak bere postutxoa izango du taldearentzako diru apurra lortzeko helburuagaz. Hala, Berangon euskal dantzek izandako 75 urteko historia biltzen duen liburua erosi ahalko da bertan, baita beste hainbat produktu ere. Gainera, azokan parte hartuko duten denen artean zozketa bat egingo dute.