Otxabene inguruan zuhaitz-landaketa egingo du Berango Lurraren Defentsan kolektibo sortu berriak domekan

Otxabenen eraikitzeko asmoen aurka Santa Ana auzoan egindako topaketa. © BERANGO LURRAREN DEFENTSAN

"Proiektu txikitzaileak salatzeko asmoz" eratu dute Berango Lurraren Defentsan taldea, haren sortzaileek azaldu dutenez. "Berangoko merkataritza-parkea; Sopela eta Azkorri lotuko dituen errepidea; Otxabenen, Otxandategin, Etxebarrin, Aranan eta Mastiganen eraikiko diren etxebizitzak...", ipini dituzte adibide. Domeka goizean landaketa egingo dute Otxabenen, "porlanez ito nahi dituzten lurrak zuhaitzekin indartzeko, eta herritarrak bertara joateko deia egin dute.

Taldeko kideek gogorarazi dutenez, datozen zortzi urteetan 2.376 etxebizitza eraki gura ditu Berangoko Udalak, HAPOaren arabera. Asmo hori betez gero, "eta kontuan izanik etxebizitza bakoitzean gutxi gorabehera 2,5 pertsona bizi direla, Berangora 5.940 bizilagun etorriko lirateke", azaldu dutenez. Hartara,  populazioa "izugarri handitzea" eragingo luke hirigintza-plana gauzatzeak, Berango Lurraren Defentsan kolektiboren esanetan, gaur egun 7.000 biztanle inguru baititu udalerriak.

"Epe laburrean, arriskurik handieneko guneak Otxabene, Otxandategi, Etxebarri eta Aranakoak dira", adierazi dute; "lur horien balio soziala, ekologikoa eta historikoa eta nekazaritza suntsituko dituzte". Gainera, aipatutako proiektuetako asko herritarren parte-hartzerik gabe onartu direla salatu dute. Hori dela eta, joan den astean Otxabene inguruko hirigintza-proiektuaren berri eman eta udal-gobernuaren asmoak salatzeko txokolate-jana egin zuten Santa Anan, eta helburu beragaz antolatu dute domekako zuhaitz-landaketa, 11:00etan.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun