Berango In Memoriam

Gerrako memoriak jasotzen dituen liburua aurkeztu du Udalak

© BERANGOKO UDALA

Berango in memorian. Gerra Zibila, 1936-2020 liburua aurkeztu dute gaur Berangoeta kultur etxean. Ekitaldian Anabel Landa alkatea eta Aitor Miñambres liburuaren egile, Burdin Hesiaren Memoriaren zuzendari eta zinegotzia egon dira. "Errepresioa eta gerrako jazoerak eurak beste herri batzuetan bezain gordinak izan ez baziren ere,  Berangon inor ez zen bizi izan gerratik aparte, eta denei eragin zien zer edo zer galtzea", esan du Miñambresek. 

Aurkezpenaren hasieran, Anabel Landak Udalaren izenean eskertu du Miñambresek "musu truk" egindako lan eskerga. Era berean, azpimarratu du edizio-gastuak ordaintzeko Gogora Institutuak emandako laguntza. "Berango Udalak memoria historikoagaz daukan konpromisoaren adierazle da liburu hau", adierazi du Landak, "bertan deskribatutako gertaerak eta egoerak ezezagunak dira gaur egungo berangoztarrentzat, eta zabaldu gura ditugu".

Izan ere, gura duten herritarrek liburuaren doako ale bat eskuratzeko abagunea izango dute (etxe bakoitzeko bana), Udalak laster jakinaraziko duen leku eta orduetan.

Burdin Hesia, amaitu bako arma-fabrika, Franco Berangon...

Aitor Miñambresek liburuaren edukiaren berri eman du labur-labur. Besteak beste, gogora ekarri du 36ko Gerra hastean berangoztarrak, inguruko herrietakoak legez, mobilizatu egin zirela, eta Burdin Hesia eraikitzen parte hartzeaz gain, arma-lantegi bat altxatzeari ekin ziotela gaur egun Eroskiren hipermerkatua den horretan. "Eibarko industria atzeguardiara eraman zuten eta bertan hasi ziren ordezko fabrika bat egiten". Hala ere, lantegia martxan hasi baino lehen sartu ziren frankistak Berangora, liburuan ondo azaltzen denez, argazki eta guzti.

Hainbat testigantzak jasotzen dira liburuan, horien artean orduko jazoerak zuzenean bizi izandako lau berangoztarrenak (artean umeak ziren, jakina). "Burdin Hesia apurtu eta erretiran zihoazen gudari batzuenak ere badaude, frankistak ailegatu orduko azken orduak zelakoak izan ziren deskribatzen dituztenak", gaineratu du Aitor Miñambresek. Gerora, Flechas Negras Brigadako soldadu italiarrak egon ziren herrian, eta Franco bera eurakaz elkartu zen Berangon, zorionak emateko.

Bestalde, frontean hildako herriko zortzi semeren berri ematen du Berango in memoriam liburuak, eta desagertutako bat eta fusilatutako beste bat ere aipatzen ditu.

Erlazionatuak

"Berangon gerra zelan bizi izan zen erakutsiko dugu domekan"

Berango

Modu berezian ospatuko du zazpigarren urtemuga Berangoko Burdin Hesiaren Oroimenaren Museoak. Datorren domeka eguerdian gerra-garaiko giroa birsort...
Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun