Apirilaren 6an jarriko dute martxan Berangon Auzotaxi zerbitzua

© BERANGOKO UDALA

Udalerriko 70 urtetik gorako edo mugikortasun-arazoak dituzten pertsonei bideratutako zerbitzua izango da. Hala, udalerriko irisgarritasuna hobetu gura dute, osasun-etxe eta ospitaleetara hurbiltzeko, baita udalerriko banketxe, komertzio, udaletxe eta garraio-publikoen zerbitzuetara joan-etorriak egiteko, besteak beste.

Apirilaren 6tik aurrera jarriko dute martxan Berangon auzotaxi zerbitzua, printzipioz, urtebetez. "Proba pilotua izango da hau", azaldu du Anabel Landa alkateak. Eskaintza horren bitartez, udalerriko irisgarritasuna hobetu gura dute pertsona nagusien eta mugikortasun-arazoak dituztenen artean, besteak beste.

Zehazki, zerbitzua bideratuta egongo da Osakidetzako osasun-etxe eta ospitaleetara hurbiltzeko, baita udalerriko banketxe, komertzio, udaletxe eta garraio-publikoen zerbitzuetara joan-etorriak egiteko, besteak beste.

Udal-agintariak zehaztu duenez, zerbitzu hori eskaini ahal izateko Bizkaitaxi elkarteagaz elkarlanean ibiliko dira. Hori erabili ahal izateko, baina, aldez aurretik zerbitzuaren eskaera egitea gomendatu du. Gainera, horren erabiltzailea izateko, beharrezkoa izango da auzotaxiaren txartela izatea; pertsonala izango da hori, erabiltzaile bakoitzak berea izango du. Horretan, besteak beste, zerbitzua eskatu ahal izateko telefono zenbakia agertuko da: 946 680 008.

Tarifei dagokienez, urtean 13.300 euroko diru-sarrera gordinak dituzten erabiltzaileek doan erabili ahal izango dute auzotaxia; gainontzekoek, aldiz, 3 euro ordaindu beharko dute udalerri barruko bidaia egiteko, eta 6 euro herritik irten behar izatekotan, hala nola ospitalera joateko. Tarifak ez du kontutan hartuko zenbat bidaiari doazen kotxean.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun