Berangoko Udalak jakinarazi duenez, maiatza aldean, herritarrentzako udal-txartela jarriko dute martxan. Horren bitartez, askotariko tramiteak erraztu gura dizkiete auzokideei, hala nola titularra udal-zerbitzuetan identifikatzeko, instalazioetan sartzeko, tramiteak egiteko, izen-emateetarako, udalekuetan lekua hartzeko, sarrerak erreserbatzeko... Horrez gainera, Anabel Landa alkateak iragarri duenez, laster ikasteko gela berriak jarriko dituzte martxan Santa Anan, eta, horiek erabili ahal izateko, herritarrentzako udal-txartel honen bidez erreserbatu ahal izango da lekua: "Modu horretan, ikasleek jakin ahal izango dute aldez aurretik lekurik dagoen edo ez, besteak beste".
Txartelak eskuragarri jarriko ditu Udalak, doan, baina aldez aurretik eskatu beharko dira, udaletxean bertan. Informazio gehiago laster jakinaraziko dute udal-arduradunek.