Oraingoan, aurrekontu parte-hartzaileak osatzeko egitasmoa fase bitan banatuko da. Lehenengoa daborduko martxan da, eta Berangon erroldatutako edozeinek parte hartu ahal izango du horretan, ekainaren 27ra bitartean. Proposamenak bildu ostean, horien balorazio teknikoa egingo da, eta bigarrenean, aldiz, aurreko fasetik proposatutako proiektuak lehenesteko aukera izango dute herritarrek.
Parte-hartze bideak bi dira: aurrez aurrekoa eta online. Lehenengoaren kasuan, interesdunek euren iritziak eman ahal izango dituzte udalerrian kokatutako postontzietan; gainera, hilaren 17an, eguenean, pertsona bat auzoz auzo ibiliko da parte-hartzea sustatzen, 10:30etik 14:00etara eta 16:00etatik 19:00etara. Internet bidez parte hartu gura dutenek, aldiz, inprimakia bidali beharko da partaidetza@berango.org helbidera, edo horretarako ahalbidetu dute formularioa beteta.
Ohi den legez, partaidetza-arauek ezartzen dute herritarrek planteatu beharreko proposamenek udal-eskumenekoak izan behar dutela, obrakaz, hirigintzagaz eta mantentze-lanakaz lotuta, baita teknikoki edo ekonomikoki bideragarriak izan ere. Era berean, interes orokorra, ondasun komuna eta udalerriko auzo guztien arteko oreka lehenetsiko dira.