Berangoko Udalak hainbat ekintza prestatu ditu herritarren artean euskararen erabilera eta ezagutza bultzatzeko. Hala, baserrietako produktuak, artisautza edo liburuak eskainiko dituzten bederatzi postu jartzeaz gain, magia eta musika ikuskizunak egongo dira. Zapatuan eta domekan izango da, Sabino Arana kalearen inguruan.
Hasteko, bihar, 11:00etatik aurrera, produktu ezberdinak eskainiko dituzten postuen zabaltzeagaz hasiko dira jarduerak. 12:30etik aurrera, Ein GO musika taldeak herriko kaleak girotuko ditu bere doinuakaz. Arratsaldean, aldiz, Jose Mendez musikalariak ere bere doinuak ekarriko ditu Berangora, 18:30ean.
Magia protagonista
Magia ikuskizunak hiru lekutan egingo dituzte: frontoiaren ondoan, kalistenia gunearen ondoan eta Moreagako autobus-geltokian. Zapatuan, 18:00etan hasita, hiru ikuskizun eskainiko dituzte asteburuan zehar: alde batetik, Eriz magoak Auskalo umeentzako ikuskizuna eskainiko du, eta publikoaren eta magiaren laguntzaz bere hanka sartzeak konponduko ditu; bestetik, Marsel magoak ere publikoaren laguntza beharko du bere magia trikimailuak egin ahal izateko; bukatzeko, Blanco magoak Mister Balncoren misterioak ikuskizunagaz egongo du, zentzumenen bidez umorea eta emozioak azaleratzeko.
Domekarako ere egitaraua prestatu dute, hala, 11:00etatik aurrera, El Despiste taldearen musika alaiak herria girotuko du. Eguerdian, aldiz, magia ikuskizunak bueltatuko dira, 15:00etan jarduera guztiak amaitu arte.