Berangoko Nazioarteko Milia egingo dute zapatu honetan

© BERANGO ATLETISMO TALDEA/JOSU HERNANDEZ JAMBRINA

Pandemiaren ondorioz bertan behera geratu ondoren, bueltan da Berangoko Nazioarteko Milia, espainiar Estatuko miliarik onena, hain zuzen ere. Maila guztietako atletak egongo dira aurten egingo duten XXXIII. Berangoko Nazioarteko Milian.

Urriaren 9an, zapatuan, egingo dute Berangoko Nazioarteko Miliaren 33. edizioa. Iaz, COVID-19aren ondorioz, bertan behera geratu zen atletismoaren festa, baina bost urtez Espainiako Estatuko hiri-probarik onena izendatu duten Milia bueltan da. Guztira, hainbat kategoriatan banatutako 18 proba antolatu dituzte lasterketa osatzen duten 1.609,344 metroko distantzian lehiatzeko. Bertan, lehen mailako atletakaz batera, adin eta maila guztietako lasterkariak elkartuko dira, paralinpikoak barne.

Aurreko urtean, pandemiaren ondorioz, eliteko probak bakarrik lehiatzeko aukera izan bazuten ere, hautabide hori baztertu zuten; izan ere, Josu Hernandez Berango Atletismo Taldeko presidenteak aitortu zuenez, "harrobiaren parte-hartzerik gabe Milia antolatzeak ez dauka zentzurik". Bestalde, nabarmendu du ekitaldia antolatzeak aparteko motibazioa eragiten duela taldekideen artean, eta, erantsi duenez, "horregaz, oinarrizko kirola sustatzen saiatzen gara, eta gure udalerrira elitezko atletak hurbiltzea lortu ere".

Lasterketaren aurkezpenean, Anabel Landa Berangoko alkateak herritarrek frogari ematen dioten babesa goraipatu zuen, eta seigarren urtez Estatuko Miliarik onena izateko erronka dutela iragarri zuen. Hurrengo Milian honetan parte hartuko duten asko lehen mailako lasterkariak dira, eta, horietatik, batek baino gehiagok lehiatu da aurtengo Tokioko Olinpiar Jokoetan. Horietaz gain, Berango Atletismo Taldeko ehun bat eskola-atletek eta 80 federatuk parte hartuko dute, beste askoren artean.

Lehen probak urriaren 9ko 16:10etan hasiko dira, 12 urtez azpikoen lasterketakaz. Ondoren, adinaren arabera jarraituko dute lasterketek, eta azkenak paralinpikoak, elite emakumezkoak eta elite gizonezkoak izango dira, bata bestearen atzetik.

Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun