Gorlizko Nekane Iturregi, Barakaldoko Maider Lozano eta Zizurkileko Iraia Arburuak sortutako proiektua da Gorriaz dokumentala. Bere helburua da genero-ikuspegia bizitzaren hainbat dimentsiotan txertatzea eta aplikatzea, eta horregatik, uste dute beharrezkoa dela "sexu-hezkuntza lantzea, hilekoaren hezkuntza bereziki, ikuspegi feministatik". Hala, EAEko, Hego Koreako eta Indiako emakumeen esperientziak jaso dituzte landutako dokumentalean, hilekoa nola bizitzen duten ikusarazteko. Maiatzaren 30ean dokumentalaren aurkezpena egingo dute Berangon, arrastiko 17:00etan, herriko kultur etxean.
Hilekoaren inguruan berba egiteko motibazioa emakumeen bizipen eta ikuspegi ezberdinak erakusteko nahitik sortu zitzaien. Duela urte eta erdi hasi ziren proiektuagaz, baina lehenago ere hilekoaren inguruko lanak jorratu dituzte. Hala, dokumentalaren bidez leku ezberdinetako emakumeen errealitatea erakusteaz gain, "guneen transformazioa" ere dute helburu: "Gune inklusiboen sorrera eta transformazioa beharrezko ikusten dugu, leku asko ez daudelako produktuen erabilera duin batentzako prestatuta".
Hala, proiektu honek euren hilekoarekiko ikuspegia aldatu die, izan ere, bakoitzaren pribilegioen inguruan hausnartzeko aukera izan dute beste herrialdeko emakumeakaz berba egin ostean. "Batzuetan, kontziente izan gabe ere, alderdi batzuetan ezjakintasuna sentitu ahal duzu, ezagutza asko falta delako hilekoaren inguruan", azaldu dute sortzaileek.
Dokumentala haiek ere grabatu dute, euren mugikorrakaz. Hala, eskualdean ikusgai egongo da bihar, martitzena, Berangoko kultur etxean, arrastiko 17:00etan.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
