Itziar Castrillo musikari berangoztarrak azaltzen duenez, Bart…Sax! duela 17 urte sortu zuten Durangon, Bartolome Ertzilla Musika Eskolako eta Kontserbatorioko saxofoi ikasgelako proiektu gisa. Gaur egun, berangoztarraren zuzendaritzapean, Big Band amateur honek Euskal Herriko hainbat txokotan jo izan du, beti ere musikarekiko pasioz eta ikus-entzuleak gozarazteko helburuagaz.
Oraingoan, Danel Arteaga izango dute lagun. Sondikako abeslari gazteak ibilbide oparoa du: Leioako Musika Eskolan hasi zen, Kantika Koralagaz nazioartean aritu da eta, gaur egun, San Juan Bautista Koraleko kidea da. Gainera, iaz Ztanda (ETB1) eta, aurten, La Voz (Antena 3) saioetan lehiatu izan da. "Proiekzio handiko artista gaztea da, bere sentikortasun eta ahots beroarekin hunkitzen duena".
Berangoko kontzertuan, Castrillok iragarri duenez, hamabi kantu eskainiko dituzte: jazz eta swing klasikoak, pop-rock bertsio ezagunak eta eguneratutako moldaketa originalak. Musikak batuko ditu belaunaldi ezberdinak, emozioz eta energiaz betetako saio batean.
Taldeko zuzendariak azpimarratu duenez, Berangoko publikoarentzat aukera paregabea izango da bidaia musikal honetara igotzeko. "Tren hau galduko duzu?".