Elkarteak azaldu duenez, epaitegietara jo aurretik administrazio-bide guztiak agortu zituzten. Hala ere, Udalak urrian igorritako erantzunak ez omen zituen proiektuaren legezkotasunari buruzko zalantzaka argitu, ezta beharrezko barne juridikoak eskaini ere. Egoera horren aurrean, eta legeak ezarritako epearen barruan, abenduan aurkeztu zuten auzi-errekurtsoa.
Salatu dutenez, obrak auzotarren kezkak eta oharrak alde batera utzita jarri ziren martxan, eta ez zen benetako parte-hartze prozesurik egon. Haien ustez, horrek "herritarrek beren auzoari eragiten dioten erabakietan parte hartzeko duten eskubidea urratzen du".
Beharrezkoa ez den proiektua
Lantzarte Bizirikek zalantzan jarri du aparkalekuaren benetako premia. Elkarteak bildutako datuen arabera, aparkalekuko okupazioa %30 ingurukoa da egun osoan zehar; horrenbestez, azpiegitura berriak justifikaziorik ez duela uste dute.
Horrez gain, gogorazi dute proiektu txikiagoak proposatu zituztela, alternatiba moduan: "Udaleko teknikariek teknikoki bideragarriak zirela onartu arren, proposamen horiek ez ziren aintzat hartu".
Elkartearen iritziz, "kasu hau ez da gertakari isolatua", baizik eta instituzioen jardunbide sistematiko baten adierazle. Horregatik, "herria defendatzen" jarraituko dutela adierazi dute, eta antzeko erabakiak herritarren gainetik har ez daitezen, legezko bide guztiak baliatuko dituztela.