Joan den apirilaren 1ean, eguaztenean, larrialdi-zerbitzuak Basauriko etxebizitza batera bertaratu ziren 44 urteko emakume bat artatzeko, ustezko ondoeza izan ostean. Osasun langileek emakumearen bizia salbatzeko ahaleginak egin bazituzten ere, bertan hil zen. Hala ere, heriotzaren zergatiak argitzeko egindako analisi forentseak susmo guztiak piztu zituen, heriotza bortitz baten zantzuak topatu baitzituzten.
Horren ondorioz, Ertzaintzak ikerketa abiatu eta joan den barikuan bere bikotekidea atxilotu zuen Bilbon, genero-indarkeria arloko giza hilketa egotzita. Ikerketak agerian utzi duenez, 45 urteko atxilotuak indarkeria matxistako aurrekariak zituen eta emakumearekiko urruntze-agindua zuen indarrean.
Berangoko Udalak jakinarazi du emakumea Berangoko zela eta adierazpen instituzional irmoa onartu du erailketa matxista hau salatzeko. Horretan, bere "gaitzespenik handiena" adierazi du indarkeria matxistaren aurrean, eta gogorarazi du biktima herrian "askok eta askok gogoan duten emakumea" dela.
Hilketa matxista hau salatzeko, Berangoko Mugimendu Feministak eta Udalak, udalerriko hainbat eragilegaz eta Berangoko Emakumeen Elkarteagaz batera, elkarretaratze deialdia egin dute gaurko, apirilaren 7rako, 19:00etan frontoiaren atarian.