Etxebizitzak Arana eremuan daude, Karabiazpi eta Arene Bidea kaleen arteko garapen urbanistikoaren barruan. Obrak amaitzear daude, eta aurreikuspenen arabera, uztailerako bukatuko dira; orduan egingo da etxebizitzen esleipena, zozketa bidez.
Sustapenak logela bat zein biko etxebizitzak biltzen ditu, guztiak terrazadunak, eta garajea zein trastelekua bezalako eranskinak dituzte. Era berean, energia-eraginkortasunari lotutako sistemak izango dituzte; hala nola geotermia, eguzki-plakak eta lurzoruko berokuntza.
Sarbide baldintzak eta prezioen tartea
Etxebizitza hauek eskuratzeko, eskatzaileek ezin izango dute beste etxebizitzarik izan, eta urteko diru-sarrerak 15.000 eta 50.000 euro artekoak izan beharko dituzte. Halaber, berme ekonomikoak aurkeztu beharko dira; hau da, fidantza, gordailu gehigarria eta senide zuzen baten abala.
Alokairuen prezioak 330 eta 920 euroen artekoak izango dira, etxebizitzaren ezaugarrien eta diru-sarreren arabera. Zenbateko horiei komunitate-gastuak gehitu behar zaizkie: 100 euro inguru logela bateko etxebizitzetan eta 135 euro ingurukoak bikoetan.
2023an onartutako araudiaren arabera, lehentasuna izango dute udalerrian erroldatuta egon direnek, gutxienez azken sei urteetan hiru urtez. Etxebizitzak hutsik geratuz gero, baldintzak beste kolektibo batzuetara zabalduko dira: udalerrian lan egiten duten pertsonetara edo Uribe Kosta eskualdeko biztanleetara, kasu.
Eskaerak bide telematikoaren bidez edo aurrez aurre aurkeztu ahal izango dira Nera Homes enpresaren bitartez.