Prozesuak Axgane, Santa Ana eta Otxabene auzoetan bizi diren auzokide zaharrentzat eta berrientzat sortu dute. Udalak azaldu duen bezala, ekimena herrikoen ikuspuntua batzen hasiko da. Honen helburua auzoak eta auzokideek dituzten beharrak identifikatzeko eta bizikidetasuna sustatzeko dituzten proposamenak ezagutzea da. Era berean, Udalak hainbat saio parte-hartzaile antolatzea aurreikusi du; hurrengo hilabeteetan aurrera eramango den ekintza plan bat sortzeko helburuagaz.
Udalak adierazi duen moduan, gainera, egitasmoak podcast komunitario baten sorrera ere dakar. Bertan hiru profilek parte hartuko dute: Berangoko batek, auzokide berri batek eta tokiko merkataritzari lotutako norbaitek. Horren lehen atala gaur izango da, maiatzak 25, eta Otxabeneko harmailetan grabatuko dute auzoaren eboluzioaren inguruko ikuspuntu berriak aurkitzeko asmoagaz.
Udaletik herritarren parte-hartzearen garrantzia azpimarratu dute: "Komunitatea sortzea ez da bakarrik erakundeen ardura, Berangoko auzoetako herritarrena ere bada". Jarduera honegaz, Udalak Berangoko auzoak logela eredutik ihes egin dezatela lortu gura du; izan ere, horren aldez, bizikidetasuna, elkartasuna eta gizarte-jarduerak sustatu gura ditu.