Estalki berriari esker, plazak ez du eguraldiaren menpe egon beharko, eta kontzertuak, ikuskizunak, azokak nahiz bestelako ekitaldiak euri edo eguzkiaren eraginik gabe egin ahal izango dira. Horrela, udalerriak erabilera anitzeko espazio estali berri bat izango du.
Proiektua ez da udalaren ekimen hutsa. Izan ere, Auzokatze parte-hartze programan herritarrek behin eta berriz adierazitako beharrizanetako bati erantzuten dio. Udalaren arabera, helburua herritarren eskaerei erantzutea eta Otxabene plaza herriko topagune gisa indartzea da.
Urte osorako espazio erabilgarriagoa
Plaza estaltzeak aukera emango du jarduerak bertan behera ez uzteko eguraldi txarragatik, eta programazioa urte osoan zehar antolatzeko malgutasun handiagoa izango du Udalak. Gainera, espazioak herriko elkarteentzat eta ekitaldi publikoentzat ere erabilgarritasun handiagoa izango du.
Momentuz, lanak esleitzeke daude; hori egin orduko, obrak hasiko dira.