Bizilagunek argi dute auzoen izaera mantendu gura dutela. Lasaitasuna, segurtasuna eta mendia, Fadura eta berdeguneak gertu izatea dira gehien baloratzen dituzten ezaugarriak. Baina eguneroko bizitzari begira, merkataritza, aisialdi eta zerbitzu eskaintza eskasa dela uste dute, eta horrek "logela-auzo" baten sentsazioa sortzen duela ohartarazi dute.
Proposamenen artean supermerkatuak eta elikadura-dendak, farmaziak, kafetegiak, tabernak, ile-apaindegiak, gimnasioak eta osasun-kontsultak ageri dira. Gainera, hutsik dauden merkataritza-lokalak aprobetxatzea proposatu dute, negozio txikiak erakartzeko alokairu merkeagoak edo ekintzailetzarako bestelako laguntzak eskainita.
Autobus gehiago eta autoarekiko mendekotasun gutxiago
Garraio publikoa hobetzea da herritarrek mahai gainean jarritako beste eskaera nagusietako bat. Autobus bidezko lotura hobeak gura dituzte Berangoko erdigunera eta metrora joateko, baina baita ikastetxeetara, anbulatoriora eta Getxo, Algorta edo Sopela bezalako inguruko herrietara heltzeko ere.
Maiztasunak handitzea ez ezik, anezka-zerbitzuak edo Berango barruan ibiliko litzatekeen mikrobus bat jartzea ere proposatu dute. Horregaz batera, oinezkoentzako eta bizikletentzako ibilbideak eta kaleetako argiztapena hobetzea eskatu dute. Helburua eguneroko joan-etorrietarako autoa hain beharrezkoa ez izatea da helburua.
% 45ek topagune gehiago gura dituzte
Auzoko bizitza egiteko leku gehiago ere falta direla ondorioztatu dute. Parte hartu duten herritarren % 45ek uste dute gaur egun ez dagoela nahikoa elkargune. Kafetegiak, parkeak, kirol-instalazioak eta erabilera komunitarioko lokalak dira gehien aipatutako aukeretako batzuk.
Horretarako, lehendik dauden espazioak hobeto aprobetxatzea proposatzen du diagnostikoak. Besteak beste, plazei eta ekipamenduei erabilera handiagoa ematea eta gaur egun gutxi erabiltzen diren eraikinetarako aukera berriak aztertzea planteatu dute, Lipperheide baserria kasu.
Eta espazioak ez ezik, horiek betetzeko planak ere gura dituzte. Aire zabaleko zinema, azokak, kontzertuak, jaiak, tailerrak eta familia zein kirol jarduera gehiago antolatzea dira jasotako proposamenetako batzuk. Aldi berean, auzoetako berdeguneak babestea, irisgarritasuna hobetzea eta mantentze-arazoei irtenbidea ematea eskatu dute.
Orain hurrengo pausoa eskaera horiek proposamen zehatz bihurtzea izango da. Irailaren 24an, Santa Anako Kultur Etxean, auzoko bizitza diseinatzeko tailerra egingo dute, eta bertan landuko dute Santa Ana, Otxabene eta Axganeko etorkizunerako zer neurri jar daitezkeen martxan.