
Eurentzat egitasmoa gune "atsegin" eta "segurua" bada ere, Berangon ez dutela horrelako talderik azaldu dute; beraz, Berbalagunetan parte hartzen duten berangoztarrek inguruko herrietara joatera behartuta ikusten dute euren burua, besteak beste, Getxora edo Sopelara, egitasmoa martxan dagoen herrietara.
Taldearen iritziz, Berbalagun proiektua herritarrak batzeko tresna ederra izan daiteke, euskararen erabilera sustatzen duena eta herrian euskaraz bizitzeko aukerak zabaltzen dituena. Hori dela eta, aldarrikapen argi bategaz zuzendu dira Udalera: "Beharrezko urratsak egin ditzala herrian Berbalagun proiektua martxan jartzeko, eta horretarako behar diren baliabideak eta elkarlanerako aukerak azter ditzala".
Sinadura-bilketan parte hartzeko deialdia
Orain, Udalari sinadura-bilketa "informala" baina sendoagoa aurkezteko helburuagaz, Berangoko 100 edo 200 euskaltzaleren sinadurak lortu gura dituzte. Horretarako, abenduaren 3aren bueltan, Euskararen Eguna aitzakiatzat hartuta, herritarren artean sinadurak biltzea aurreikusi dute. Dena den, dagoeneko martxan dago sinadura-bilketa, eta esteka honen bidez ere eman daiteke babesa.