Hasi da EHUko errektorea aukeratzeko kanpaina

Azaroaren 26an egingo dira EHUko errektorea aukeratzeko hauteskundeak, eta hautagai bakarrak aurkeztu du bere burua Nekane Balluerkaren lekua hartzeko: Eva Ferreira Ekonomia Aplikatuko katedradun eta Unibasq agentziako zuzendari ohiak. Haren aldeko botoa eta boto zuria ematea izango dira aukera bakarrak; errektore izateko, Ferreirak bozen heren bat lortu beharko du gutxienez.

COVID pandemiak baldintzatuko du gaur hasi den hauteskunde-kanpaina. EHUk azaldu duenez, botoa aldez aurretik emateko epea luzatu egin da, eta honenbestez, kanpainak dirauen bitartean (azaroaren 9tik 23ra) unibertsitateko kolektibo guztietako kideek (ikasleak, administrazio eta zerbitzuetako langileak, eta irakasle-ikertzaileak) botoa aldez aurretik emateko aukera izango dute, Nortasun Agiri Nazionalaren kopia bat erakutsita, unibertsitate erakundearen eraikin, fakultate edo eskola bakoitzean egokituko den bulego edo bestelako guneren batean. Era berean, kanpainako ekitaldi asko aurrez aurrekoak ez izatea aurreikusten da.

Boto haztatua

Unibertsitateko kide guztiek boto-eskubidea dute, baina azken emaitza boto haztatuaren araberakoa da. Hau da, bozak kolektibo bakoitzerako aurreikusitako sektoreari atxikiko zaizkio, EHUren hauteskunde-araudian ezarritako baremo honen arabera:

  • Irakasle doktore iraunkorrak: %56,25
  • Irakasle doktore ez-iraunkorrak: %7,50
  • Gainerako irakasle-ikertzaileak: %2,09
  • Ikasleak: %22,08
  • Administrazioko eta zerbitzuetako langileak: %12,08

Hautagaitza bakarra aurkezten denean, oraingoan bezala, aukeraketa itzuli bakarrean erabakitzen da. Hautesleek aurkeztutako hautagaitza bozkatu edo boto zuria eman dezakete. Hautagaia errektorea izan dadin, aldeko botoen heren bat lortu beharko du gutxienez, ezarritako ehunekoen araberako botoen haztapena egin ondoren.

Erlazionatuak

"Etxealdian, Euskal Herriko Unibertsitateak 5.500 inpaktu mediatiko sortu zituen"

EHU

Gurean Gaur albistegiaren baitako elkarrizketaren tartean, EHUko errektore Nekane Balluerka izan dugu gurekin. Kargua uzteko aste gutxi falta zaizk...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun