Pertsona bat atxilotu dute Leioako campusean eskopeta bategaz tiro egiteagatik

Eskopeta bat eskutan, gizon bat EHUko Leioako campusera sartu da gaur arrastian, 18:50ak aldera, eta hainbat tiro egin ditu airera. Ertzaintza gunera bertaratu da, eta daborduko erasotzailea atxilotu du, Eusko Jaurlaritzako Segurtasun Sailak HIRUKAri jakinarazi dionez.

Arrastiko 18:50ak aldera, Leioako campusera eskopeta bategaz sartu den gizonezko baten berri eman dio Ertzaintzari ikasle batek. Dirudienez, erasotzaileak hainbat tiro egin ditu Zientzia eta Teknologia fakultatearen barrutik, eta eraikinaren leiho batzuk hautsi ditu.

Eusko Jaurlaritzako Segurtasun Sailak jakinarazi duenez, Ertzaintzak operatiboa martxan jarri du campusean, eta bertan zeuden guztiak desalojatu ditu.

19:30erako, HIRUKAk jakinarazi duenez, poliziek armatutako gizona atzeman eta atxilo eraman dute. Ez da zauriturik egon.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun