Euskal Herriko Unibertsitateko irakasle eta ikerlariek beraien lan-baldintza prekarioak salatzeko egin duten agerraldiagaz abiatu da ikasturtea. Gaur goizean izan da, Leioako campuseko Mikel Laboa plazan, eta ELA, LAB, CCOO eta Steilas sindikatuek deialdia baliatu dute egoera hori salatzeko urriaren 11n greba egingo dutela iragartzeko.
Sindikatuen ordezkariek azaldu dutenez, Errektoretzak Unibertsitate Sistemako Lege Organiko berriaren USLOren irakurketa interesatua egiten du, eta horrek eragin zuzena du irakasleen kontratu berrietan. Gaineratu dute egoera lehendik datorren arazo bat dela eta irakasle eta ikerlari guztiei eragiten diela. Beraien ustez, "egiturazko arazoak" daude guzti horren atzean, eta, batik bat, euskal unibertsitate publikoak duen finantziazio desegokiaren ondorioa dira.
"Legearen aplikazio interesatuak eragindako aldaketak bideraezin bihurtzen du ordezko irakasleen jarraipena, lanaldi osoko ordezkapenak ia ezabatuz, eta gehienez 800 euroko ordainsariak dituzten plazak eskainiz, enplegu egonkorra duten lankideen lan-kargan eta, batez ere, ikasleek jasotzen duten irakaskuntzaren kalitatean eraginez. Ikasturte-hasiera honetan larriagotzen ari diren arazoak", salatu dute EHUko prekarioen koordinadorak.
Greba-deialdia
Sindikatuek argudiatu dutenez, "EHUn mobilizazio sendo bat abiatzeko arrazoi ugari" dituzte, beraz, urriaren 11n sindikatuek grebara deitu dituzte unibertsitate publikoko irakasleak eta ikerlariak. Beraien aldarrikapenen artean eskatzen dute ordezko irakasleentzako lanaldi-osoak eta lanaldi partzialetan dauden ordezkoen aktibitateak onartzea, irakaskuntza-zama arintzea, soldatak galdutako eros-ahalmena berreskuratzeko adina handitzea eta EHUko finantziazioa EAEko BPGren % 1era heldu arte areagotzea.
EHUko irakasle-ikertzaileen lan-baldintzen prekarizazioari EZ! Urriak 11n GREBA!!https://t.co/MxBpaJiT25 pic.twitter.com/3fYcOmHEji
— LAB UPV-EHU (@lab_ehu) September 20, 2023