Sare sozialetan zabaldutako komunikatuan azaldu dutenez, ustezko erasotzaileak mugikorragaz argazkiak eta bideoak atera zituen fakultateetako emakumeen komunetan, horman egindako zulo baten bitartez.
Halaber, egoera horren aurrean, poliziak, EHUk eta bertako segurtasun enpresak izandako jarrera pasiboa "onartezina" izan dela ere deitoratu dute. Salatu dute segurtasun arduradunei lehen momentutik erasoa jakinarazi zieten arren, ez zutela inolako neurririk hartu "froga nahikorik ez zegoela argudiatuta".
Jakinarazi dute apirilaren 19an poliziak ustezko erasotzailea atxilotu zuela, bigarren aldiz Zientzia eta Teknologiako fakultatean ikusi zutenean. "Lotsagarria da gauza bera bi aldiz gertatu behar izatea autoritateek neurriak hartzea erabakitzeko", adierazi dute.
Era berean, unibertsitateari egotzi diote "sistema patriarkalaren" instituzio bat dela eta gertatutakoarekiko erantzun faltagaz "hori erreproduzitzen jarraitzen duela", horren aurrean erantzun egokia emateko gai ez direlako izan. Gaineratu dute gertakariak argi utzi duela ikasle emakumeek ez dutela gune segururik, "eta Hezkuntza Sistemaren zein Unibertsitatearen aldetik jasaten dugun zapalkuntza oraindik".
ADI‼️
— Eiki Leioauni (@EikiLeioauni) April 20, 2024
Aste honetan erasoak jasan dituzte Leioako Kanpuseko hainbat neska* ikaslek, gizon bat komunetan argazkiak ateratzen ibili dela eta.
ERASOEN AURREAN, GUK AUTODEFENTSA FEMINISTA!!! pic.twitter.com/OaSxiqCxgq