Ikamaren arabera, selektibitatea "froga zaharkitua" da, eta ikasleen hezkuntza-prozesu osoa baldintzatzen du. Antolakundeak salatu du proba horrek ikasleak "zenbaki huts" bihurtzen dituela, eta etorkizun akademikoa zein pertsonala azterketa baten emaitzaren mende uzten duela.
Ikasle antolakundeak nabarmendu du, gainera, selektibitateak ez dituela ikasleen egoera sozioekonomiko eta pertsonalak kontuan hartzen. Haien ustez, baliabide gutxiago dituzten ikasleek zailtasun handiagoak dituzte hezkuntza-prozesuaren kostuei aurre egiteko, eta horrek desberdintasunak areagotu eta klase-sistema betikotzen du.
Euskararen egoera ere mahai gainean jarri dute. Ikamak gogorarazi du Euskal Herriko hainbat eremutan oraindik ezin dela unibertsitaterako sarbide-proba euskaraz egin; Ipar Euskal Herrian, esaterako, Baxoa frantsesez egin behar izaten dute ikasleek. Horregatik, Etxepareko ikasleei elkartasuna adierazteko argazkiak ere egin dituzte kontzentrazioen ondoren.
Egoera horren aurrean, Ikamak Euskal Herrian eraikitako hezkuntza sistema propioa aldarrikatu du: ikasleen beharretara egokituko dena, ikuspegi kritikoa sustatuko duena eta elkartasuna ardatz izango duena. Antolakundeak euskal ikasleriari borrokara batzeko deia egin dio, "merezi duten hezkuntzaren alde" mobilizatzen jarraitzeko.
"FCK SELE" dinamika apirilaren amaieran jarri zuten martxan, eta ikasturteari amaiera emateko, ekainaren 6an ikasle jaialdia egingo dute Gernikako Astran.