Bost langile zauritu ziren atzo, domeka, Erandion izandako lan-istripu batean. Segurtasun Sailak zabaldu duenez, ezbeharra goizeko 12:50ean jazo zen, Lutxana-Asua errepidean dagoen Befesa enpresan, bost beharginak labe baten ondoan jarduten zutenean. Osasun zerbitzuetako kideek bost zaurituak Gurutzetako ospitalera eroan zituzten. Haietako bat "larri" dagoela jakinarazi dute, gorputzaren %80an erredurak baititu. Erredura Larrien Unitatean artatzen dabiltza. Beste lau beharginek zauri arinak dituzte, Gurutzetako ospitaleko agiriak dioenez. Istripua zerk eragin zuen ikertzen dabil Osalan laneko segurtasun eta osasunerako erakundea.
Atzokoa ez da Befesa Aluminio SL-k izan duen lan istripu garrantzitsu bakarra. 2009ko abuztuaren 28an, 47 urteko langile bat hil zen, trabatutako makina bat konpontzeari ekin zionean. Era berean, 2013ko udan, beste behargin bi larri zauritu ziren, labetik isurkin lineara garraiatzen zuten aluminio urtuak eztanda egin eta erredurak eragin zizkienean.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!