Sondikako geltokia Lutxanakoagaz lotuko dute, Lezama eta Zazpi Kaleetako geltokien arteko lanek irauten duten bitartean. Txorierri eskualdea metro-sarean erabat sartzeko azpiegitura eraikitzeko lanak direla eta, Lezamako eta Zazpi Kaleetako geltokien arteko ohiko zerbitzua aldatu beharko dute, 3. linea amaitu arte. Eraginak murrizte aldera, Euskotren enpresa publikoak ordezko garraio-zerbitzua eskainiko du Txorierriko trenbide-linean; hala, aurreikusita daukate orain zerbitzutik kanpo dagoen Sondikako geltokiaren eta Lutxanako geralekuaren arteko trenbide trazatua egokitzea. Lutxanan garraioa aldatu beharko dute bidaiariek. Beraz, Euskotrenen eta Metro Bilbaoren arteko zerbitzu konbinatua programatu dute.
Lutxanako geralekua berriro zabalduko dutenez, joan-etorriak egin ahal izango dira Txorierri eta Bilbo artean, Euskotreneko unitateetatik Metro Bilbaokoetara aldatuz eta alderantziz. Azaldu dute programatu duten garraio-aldaketa hori dela eskain daitekeen "alternatiba onena".
Halaber, Lutxanako geltokian garraioa aldatzeko bidaiariek gehienez 5 minutu itxaron beharko dutela jakinarazi dute. Euskotrenek bidaia-titulu berri bi ipiniko ditu martxan, ohiko zerbitzua ebakita dagoen bitartean. Bono10 Konbinatuagaz hamar bidaia egin ahal izango dira Txorierri, Lutxana eta Bolueta arteko edozein geltokiren artean; bidaiaren prezioa euro batekoa izango da. Halaber, tarifa murriztuak dituzten lagunek Bono10R Konbinatua eskuratu ahal izango dute, bidaiaren prezioa 0,60 eurokoa izango da.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.