Uribe Kostako eta inguruotako ekoizleek eta kalitatezko produktuen maitaleek data garrantzitsua izango dute hilaren 31n, domeka, Erandion. Izan ere, egun horretan, Altzaga auzoko Irailaren 23a plazan egingo dute nekazaritza-azoka, goizeko 10:00etatik arrastiko 03:00etara.
Aurtengoa hamahirugarren ekitaldia izango da, eta 26 saltoki egongo dira, guztira. Eskualdeko eta inguruko ekoizleek euren produktuak erakutsi eta salgai ipiniko dituzte, esaterako: barazkiak, landareak, eztia, txakolina, euskal pastela, ogia, hestebeteak eta gaztak.
Azokaren inguruan, harri-jasotzaileek erakustaldia egingo dute bertaratutakoen gozamenerako. Txerria burruntzian prestatuko dute, eta eskaini ere bai, txorizo-dastaketagaz batera.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
