Erandioko Udalak behin-behineko 30 lanpostu sortu zituen pasa den uztailean, "enpleguaren kalitatea hobetu eta Erandion txirotasun arriskua gutxitzeko asmoz", udal arduradunek zabaldu dutenez. Udal Gobernuak azaldutakoaren arabera, "Erandioko Udalak apustua egin du udalerrian bertan lanpostuak sortzeko", herrian erroldatutako 30 auzotarri sei hilabeteko kontratua eginez. Horretarako arrazoiak honakoak izan dira: "herritarren bizi-kalitatea hobetzeko asmoa" eta "azken urteotan egoera sozial eta ekonomiko zaila bizi izan dugula" kontuan hartzea. Lanpostuak pasa den ekainean iragarri zituzten: 4 garbitzaile, 4 lorezain, 4 eraikuntza-peoi, 3 igeltsero, 5 tailer-begirale edo orientatzaile, iturgin 2, elektrikari instalatzaile 2, margolari edota papereztatzaile 2, arotz 2, eta aisialdi-begirale 2. Azken horiek herriko lonjetan dabiltza beharrean, eta bitartekaritza-zerbitzuaz arduratzen dira. Behargin denen jarduna zazpi ordukoa da egunean, astelehenetik barikura. Datorren urtarrilera artekoak dira kontratuak.
Erandioko Udalak 600.000 euro bideratu ditu kontratazio-prozesua egiteko. Hautagaiak, ordea, Erandioko Lanbide bulegoak aukeratu zituen, «parekatze automatikoaren bidez», azaldu dutenez. Lanposturen bat eskuratzeko ezinbestekoa zen langabetua izatea, Lanbiden izena eman izana, eta aurreko bi urtean horren moduko prozesuetan parte hartu ez izana. Bestalde, langabezian emandako denbora ere kontuan hartu zuten.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!